fbpx

إزاي تعمل بروفايل صايع علي لينكدان ؟!

طبعاً من المعروف إن لينكد إن هو الوسيلة الاولي في تسويق الموظفين بشكل عام و المؤسسات الكبيرة بتخلي البلاتفورم رقم واحد في الموظفين اللي بتعينهم و مدي قوة لينكدان أكونت الخاص بيهم ، ولو مثلاً معندكش أي أكونت علي لينكدان و شغال في الماركيتنج ، فانت مش بروفيشنال علي الاطلاق  ، طبعاً الاكونت القوي له معايير و من أكتر الغلطات اللي ممكن حد إنه يعملها هو إنه ميكونش مجمع مجموعات كبيرة من الدوائر الخاصة بالشغل و الشركات علي لينكدان ، و مش بيتواصل معاهم بشكل دائم ، و مش بيتابع الـتحديثات المُختلفة و اللي بتنزل كل يوم سواء في سوق العمل أو في سوق المجال بتاعه .

جمعنالكم هنا أكبر عشر غلطات ممكن تخلي الاكونت بتاعك ضعيف علي لينكدان ..

أولاً حاول متتعاملش مع لينكدان علي إنه الفيسبوك بتاعك :

ملهوش معني إنك تخش تكتب بوستات من صيغة أنكش ،يعني بلاش تشير أخبار سياسية أو إجتماعية أو رياضية حتي لو كان مجالك ، بس لو إنت صاحب موقع مثلاً تقدر تشير إنت بتعمل ايه علي إعتبار إنك بتقدم المشروع بتاعك كموقع .

ثانياً : صورة البروفايل : 

طالما بنتكلم علي مُجتمع عمل فلازم تكون عارف حاجة مهمة جداً ، أولها إنك مينفعش ترفع صورة سيلفي أو صورتك و إنت في المصيف أو صورتك و إنت في الساحل مع أصحابك ، ولا صورة مديرك في عزومة عشا مثلاُ ، صورة البروفايل هي الكابشين بتاعك بشكل عام ، هي وصف بروفايلك من برة ، لازم تكون صورة برفيشنال بتدل علي الجدية ، علي انك فاهم كويس جداً إيه هو لينكدان ، و ليه داخل فيه كمجتمع عمل ، حاول تحط صورة ليك وإنت في كورس ، في إجتماع ، ببدلة ، لو بنت لازم تلبسي فورمال و تكون الصورة بتاعتك بتدل علي انك شخصية بروفيشنال .

 

ثالثاً : وصف البيو الخاص بيك :

و هنا لازم تكون جاد في الكلام ، و بروفيشنال بتختصر في شكل بريف إيه هو مجال عملك ، إزاي بتقدر تكون مالتي إسكيلد ، إزاي بتعرف تشتغل كل حاجة ، بلاش كلام شخصي زي مثلاُ بحب تربية الكلاب و القطط و الغزلان لان دا مش فيسبوك ،

أربعة  : سمي الامور بُمسمياتها :

متكتبش كلام كبير يصغرك في يوم من الايام ، الجملة دي كنت بسمعها من مديري ديماً و مكنتش بفهمها خالص ، بس في مرة قعدت معاه و قلتله يعني ايه كلام كبير يصغرك ؟َ!

قالي يعني متحطش مثلاً كلمة سينيور و انت ماركتير فحد يطلب منك إستراتيجية تسويق ديجيتال ماركتينج متعرفش تحطهاله ، إزاي يا سينيور ؟! و متحطش نفك أرت دايركتور مثلاً و انت ديزاينر و يجي حد يطلب منه شغل أرت وورك تقوله لا و الله ماشتغلتوش ؟!

يابني مش إنت كاتب أرت دايركتور ؟! إنت كدا بتصغر نفسك و لو إتقفشت ثقتك في نفسك هتقل و هتتحطم و هتخش تكتب أي دونت بيلونج هيير !!

خمسة : بلد الـــ 90 مليون مانيجر !

أنا عندي علي لينكد إن أتر من ألف مانيجير بس ، تخيل كدا كل دول مديرين !؟ لا و الحل كمان إنه مصدق نفسه لمجرد إنه إشتغل سنتين تلاتة ، بص في سمات كتير عشان تحققها  و بعدين قول علي نفسك مانجير ، و أهمها علي الاطلاق إنك تكون أدارجي و أسطة في كل حاجة إتعلمتها ، لازم تكون مشيت في الوظيفة بكل أبعادها ، تبدء مثلاُ في مجال الماركتينج ككاتب كونتنت ، و تتعلم قواعد السيو و متعلم ازاي تسوق اون و أوف بيدج و اشتغلت و حطيت خطة و حققت فيها نتايج ، و عملت تقارير مكتوبة ، لازم تكون إسكيلد في الباور بوينت و بتكتب بسرعة و بتعرف اساسيات الاكسيل ، لازم تكون بتعرف تتكلم كبيرزنتيشن ، بعد كدا تدرجت في الاعلانات و التصميم و عرفت أساسيات التسويق من خلال استراتيجيات الاعلانات ، لازم تكون مسكت حملات إعلانية مختلفة زي البراندينج و الانلاين سيستم و حققت فيها أفكار ، لازم تنوع بين التفاعل و البروداكت ، و تكون عملت تناغم من الاتنين ، لازم تكون إشتغلت جة تيم مكون من سينيورز و جينيورز و مانجير ،  و كبرت فيه ، لازم تدي ريكمنديشين نوتز ، و أفكار دعاية و دراسة للسوق بعد كل دا تكون قضيت مش أقل من سنة كتيم ليدر ، بعد كدا إنت مانجير  .

ستة  : ترجمة جوجل :

همم .. جيت عالجرح المقفول ، أول حاجة بيعملها أي حد لسة بيبتدي يسوق لنفسه علي لينكد إن هو إنه يخش يرص شوية إسكيلز بالعربي و يفتح ترجمة جوجل و هوب دبل كيك يكوبي و يبست الكلام ، و حتي الخبرات ، شوف إنت مش بس بتضر نفسك كبروفايل ، إنت لو إتقدملك أبليكشن مكتوب فيها عرف نفسك و امتب بتعرف تعمل ايه سواء ورقة أو أونلاين أنت هتتسوح ، حاول تحفظ إنت بتعرف تعمل إيه قراءة و كتابة و كونفريزشن بشكل كويس حتي عشان تعرف تبيع نفسك .

سبعة : سؤال بيطرح نفسه ؟!

اعمل الخبرة في الشركات سنة و سنتين ، و لا اعملها كام شهر ، أزود شركات عشان يقولوا عليا بروفيشنال ولا أكتب عدد شركات قليل عشان بان اني بروح أماكن كتير فأكون مطلوب و أحط علي HR ?!

الاجابة بوضوح أكتب الصح يابني ، إكتب إنت قعدت قد ايه ،و إتعلمت ايه ، و حققت ايه ، اللي هيعمل معاك الانترفيو هيعرف ثقافتك تماماً لانه بيقيسك كسوفت اسكيلز و تيكنيكال اسكيلز ، ممكن في شركات بروفيشنال تتصل بمديرك القديم ، ساعتها مش هينفعك غير الوضوح .

تمانية :  متبعتش للفاضي و المليان :

متبعتش البروفايل بتاعك في ميل ليست و تبعته لكل الشركات لوكشة واحدة ، عارف ليه ، بالظبط كداهيخش في الاسبام ليست ، و تخيل مثلاً شكلك إيه و إنت بتبعت ايميل لـ إتش أر و هو شايف إيميلات باقي الشركات ، دا خطأ فادح في التسويق لنفسك انت كد بتسوء نفسك مش بتسوقلها ، إبعت للشركات اللي فعلاً ليها هيستوري ، متبعتش لشركة توظيف تقولك هنبعتلك السيفي بتاعك لاكتر من 50 شركة و شغل أنكش داا ،، و تلاقي نفسك بتملي أبلايكشن بخمسة و عشرين جنيه .

تسعة : ابعت منشن  لمديرك قبل كدا و خليه يخش يحطلك ريفيو :

، الاتش ار بيعجبهم الحاجات دي ، حاول تحط زمايلك كمنشن ليك يخشو يعملوا فوتينج علي الاسكيلز بتاعتك و يأيدوها ، و يحطوك في الريفيو بتاعهم ، لان دا قيمة و فاليو شديدة جداً هتخدها و هتخلي بروفايلك يطلع كتير كركمنديشن .

عشرة :خليك THOUGHT LEADER

عشان نقفل المقالة دي لازم أقولك حاول تكون قائد رأي  في مجالك ، يعني ليدر بتكتب و تتناقش ، بتحط مقالات خاصة بطبيعة شغلك ، و بتحط نصايح .. بتكتب إسبوعياً مقالة بتفيد الناس عنك ، و بتدل إنك فعلاً قائد رأي و مش مجرد أكونت ، لا أنت فعلاً بتقيم  و بتكتب و بتفيد الناس  و بتناقش .

و إعرف إن لينكدان هو أنت ، هو أول حاجة تتحط في السي في بعد اسمك هو إنجازاتك و تاريخك ، هو أول حاجة بتبعتها للناس عشان تـ MARKET  نفسك و هنكمل في المقالة الجاية عشان ايدي وجعتني ، و لو عندك إقتراحات ابعتلي علي لينكدان 😉

      Compare items
      • Total (0)
      Compare
      0